Pag-uktaba sa silot batok badlungon ning panahon sa Covid giduso sa konseho

FRONT PAGE
April 22, 2020

SHARE

ANG konseho sa syudad ubos ni bise mayor Kikang Uy mihangyo ni Mayor Oscar Moreno ug sa mga kapitan sa mga barangay ning dakbayan pag-uktaba sa pagpahamtang sa administratibong silot ngadto sa mga masapong makalapas sa mga ordinansa kalabot sa Covid 19 pandemic.

Gitumbok niini ang pagpahamtang sa administrative penalty nga community service ngadto sa masapong makalapas sa mga ordinansa sa dakbayan nga nagpatuman sa mga lakang pagpakgang sa pagkaylap sa nahisgotang sakit.

Sa sesyon sa konseho niadtong Lunes, si konsehal Edgar Cabanlas miduso sa resolosyon alang sa maong katuyuan human namatikdan nga ang mga masapong makalapas sa pipila ka ordinansa sama sa curfew hours gidala dinha sa barangay 40 aron pasabton sa ilang mga kalapasan.

Iyang gipasabot nga kun dili una ipatuman ang silot nga community service malikayan ang pagtapok sa mga tao ug mahimong silbihan ang maong silot kun mawagtang na ang gipatumang community quarantine.

Sa iyang bahin si konsehal Ian Mark Nacaya mipasabot nga dili tumong sa maong hangyo nga wagtangon ang silot kun dili gitinguha kini nga malikayan ang pagkuyanap sa virus sa ingon masunod  ang physical/social distancing samtang padayon pang gipatuman ang community quarantine  sa syudad. (SP/MLRapanot)


RELATED ARTICLES

LEAVE A REPLY

Subscribe Now!

Receive email updates from Mindanao Daily News.